Arkadag stadionynda geçirilen final duşuşygynda Arkadag futbol topary Türkmenistanyň Kubogyny eýeledi
27-nji dekabrda Arkadag şäheriniň döwrebap “Arkadag” stadionynda ýurdumyzyň futbol taryhynda möhüm orun eýeleýän Türkmenistanyň Kubogyny almak ugrunda final duşuşygy geçirildi. Jemleýji oýunda “Ahal” hem-de “Arkadag” futbol toparlary duşuşyp, tomaşaçylara ýokary derejeli sport baýramçylygyny döretdiler.
Duşuşyk ýokary depginde, gyzykly hüjümler we güýçli garşydaşlyk bilen geçdi. Netijede, duşuşyk 2:1 hasabynda “Arkadag” futbol toparynyň peýdasyna tamamlandy. Şeýlelikde, “Arkadag” topary 2025-nji ýylyň Türkmenistanyň Kubogyny mynasyp gazanyp, ýeňiş kubogyny ýokary galdyrdy.
Bu taryhy oýna Arkadag şäherindäki Sahy Jepbarow adyndaky ýörite sungat mekdebiniň talyplary we mugallymlary hem gatnaşdylar. Olar duşuşygyň dowamynda toparlary ruhlandyryp, sportuň jemgyýetçilik ähmiýeti, ýaşlarda watansöýüjilik we agzybirlik duýgularyny ösdürmekdäki orny barada gymmatly tejribe aldylar.
Mekdebiň mugallymlary şeýle giň gerimli sport çärelerine gatnaşmagyň ýaşlaryň dünýägaraýşyny giňeldýändigini, döredijilik ukyplaryny ösdürýändigini we sagdyn durmuş ýörelgelerine bolan höwesini artdyrýandygyny bellediler. Talyplar hem öz gezeginde final duşuşygynyň olaryň üçin ýatdan çykmajak täsir galdyrandygyny, ýeňiş pursatynyň bolsa aýratyn ruhy güýç berendigini aýtdylar.
Arkadag şäherinde geçirilen bu sport dabarasy diňe bir futbol baýramçylygy bolman, eýsem ýaş nesliň ruhy we medeni taýdan kämilleşmegine goşant goşýan möhüm jemgyýetçilik çäreleriniň biri hökmünde hem aýratyn ähmiýete eýe boldy.
