"Çekseň zähmet-ýagar rehnet"
Daýhan yhlasyndan kemala gelen bol hasyl türkmen topragynyň berekedi hem-de saçagymyzyň rysgalydyr. "Çekseň zähmet-ýagar rehnet" diýlişi ýaly, daýhanlaryň alyn deri ene ýere siňip, zere öwrülýär. Ýurdumyzda her ýylyň noýabr aýynyň ikinji ýekşenbesinde Hasyl toýy giňden bellenilýär. Oba-kentlerimiz toý lybasyna beslenip, dabaralar uludan tutulýar, milli däp-dessurlarymyz berjaý edilýär. Toý gününde daýhanlarymyza, oba hojalyk işgärlerine döwlet sylaglary, Şa serpaýlar gowşurylýar.
Hormatly Prezidentimiziň belleýşi ýaly, Hasyl toýy merdana halkymyzyň yhlas bilen zähmet çekip gazanan baýlyklaryna, sahawatly türkmen topragyndan öndüren hasylyna bolan buýsanjynyň aýdyň beýanydyr, ene topraga yhlasynyň we söýgüsiniň dabaralanmasydyr. Hasyl toýy türkmen daýhanlarynyň çekýän halal zähmetine döwlet derejesinde goýulýan belent sarpadan aýdyň nyşandyr.
Eziz Diýarymyzda däneli ekinleriň, pagtanyň, gök-bakja önümleriniň, miweleriň, ir-iýmişleriň bol hasyly ösdürilip ýetişdirilýär. Bu bolsa azyk bolçulygyny üpjün etmäge giň mümkinçilik berýär. Oba hojalyk ekinlerini ösdürip ýetişdirmek üçin daýhanyň daýanjy bolan döwrebap, kuwwatly oba hojalyk tehnikalary, enjamlary we gurallary yzygiderli satyn alynýar.
Ata Watanymyz ak bugdaýyň mekanydyr. Gahryman Arkadagymyzyň "Änew-müňýyllyklardan gözbaş alýan medeniýet" atly kitabynda bäş müň ýyl mundan ozal ösdürilip ýetişdirilen ak bugdaýyň däneleri hakynda gymmatly maglumatlar berilýär. Şöhratly ata-babalarymyzyň bu bereketli toprakda kemala getiren ekerançylyk däpleri häzirki döwürde täze mazmun bilen baýlaşdyrylýar. Türkmenistan diňe bir azyklyk däl, eýsem , tohumlyk bugdaý ösdürip ýetişdirmekde hem uly üstünlikleri gazanýar. Türkmen halky "Tohum al-da ýere bar, gögermese, maňa gel", "Ýandak sere-tohum ýere", "Arpa eken bugdaý ormaz", "Ir eken harman alar, giç eken -arman" ýaly tohumçylyk, ekiş bilen bagly gymmatly pähimleri döredipdir.
"Halkara parahatçylyk we ynanyşmak" ýylynda bereketli türkmen topragynyň sahawatynyň şanyna tutulýan Hasyl toýy bilen tüýs ýürekden gutlaýarys. Berkarar döwletiň täze eýýamynyň Galkynyşy döwründe sahawatly türkmen topragynyň berekedi, harmanlaryň çäji egsilmesin!
"Fortepiano" bölüminiň
II-ýyl talyby Nepesow Gurbandurdy
